O rat pani na ovela

Jekh vakti divdinela sine jekh tagar. Thaj uzal odova ov so sine but barvalo numa sine bibahtalo sebepi so na sine ole have. but sastarne te dikhel soske nae ola have ama bizo.

Jekh dive, ki thagaripaskiri avlin phirela o veziro thaj phenda oleske: - Pakivale thagareja, te šaj te na dukhal tumaro vilo pobuteder. Hemšukar ka ovel te len tumenge havo javere dadestar thaj dajatar, tegani me ka vakerav sarinenge so bijandilo tumenge murš havo. E have nane te rodel nijekh thaj adahar nae te danel khoni bašo o havo so nane tumare ratestar.. Gndindor ki petse, o thagar, ali oleske šukar i idea thaj phenda e vezireske te kerel odova... Javer dive cidinda o veziri e thagarutneskere manušencar te roden murše haven. Soro dive phirde akate , okote bišo te arakhen jekhe šue, tikne have. Thaj nijekh namanglja te del ple porodo. Ama ko agor e diveske arakhle jekhe tikhe murše have savo so sine romano havo. I familija divdinda ko jekh but tikno kher dur kotar i diz. Oleskoro dad thaj i daj kherena sine sepetke so bikide ko vašajra thaj sine but orole manuša. Olengere muke našavdona sine taro e haveskoro šukar kefluko. O havo sine olengoro baro bahtalipa. Ov sakova far sine lošalo, šukar thaj giljavda sar jekh irikli. Ama oleskiri familija,  gndindor so ka den e have e thagareske, mangindor kaj ka ovel ole šukar, barvalo thaj pošuo divdipa dinde olen e have. O veziri ljelja e have thaj legarda ole ko thagaripa. I daj oleskiri rovda pali oleste dive thaj rat. O aver dive sarinenge vakerdape so i thagarni bijanda murše have thaj so o thagaripe lela te brakerel o bijanipe e haveskoro. Sa o manuša ko thagaripa hale thaj pile trin dive thaj trin raa. O vakti nakhela, o havo bajrovela trujalime thaj bahtalipaja. O havo ulo but šuo thaj sikavno manuš so sarine mangle ole. Nakhle trin berša, o thagar mulo but bare phuripastar thaj pali i  tradicija sa e manuša so ka oven oleskere thaneste i kruna ka lela o havo saveske vakerde soj tano e thagareskoro havo. Keda ulo thagar, o terno havo lela e vezire thaj javere manušen, cidinda te pendarel e manušen save so divdinena ko oleskoro thagaripa. Sarine adikerde ole šukaripaja, gilencar, khelibaja thaj bašalibaja. Ko drumo, kote so ov nakhlja, o manuša frdena sine luluda. Nakhle but baro drom thaj jekh dive resle di ki jekh bari veš. Ahavda o terno thagar ple manušen, dikhlja, dikhlja thaj vakerda: - E save šue ranika! Save sepetke olendar šaj te oven kerde! Keda šunda o phurano veziri, jekhfarestar dinda pes ki godi bašo odova save ratestar avela o terno thagar thaj gndinda korkor peste: - E ae, o rat pani našti te ovel! AGOR..