Paramichia pa sumnakuno pundro

  Durmut kana nas komputerura thaj telefonura trajijas jekh barvalo bahtalo Grofo ande Russia...

Kadale grofos sas jekh shukar romni, khatik nas lako pharo, kasavi shukar sas ke e manush ladjanas pe vi te dikhen pe late ande laki shukh. Voj sas zurales shukar numa sas vi klumpig, jekh djes kana voj sas te uljel tele pa e trapti ande djis pelas e chorri thaj paglas pesko pundro pe efta thana. E doktora chi birisarde te keren kanchi, zumavnas te sastiaren o pundro numa kanchi chi zhutijas thaj musajsas te keren amputatcia thaj te shinen lako pundro. E Romni thaj o grofo rote avri penge jakha numa e grofos avilas jekh idea, vov sas te keravel peska romniake jekh sumnakuno pundro, ke vov kamelas la kade zurales but ke kamlas te shiol lake jekh sumnakuno pundro thaj sas les love te kerel kodo. Kana shute e doktora o sumnakuno pundro po than trjinas von pale bahtales thaj o grofo loshalas zurales peska romniake. Jekh djes uravlas pe e romni ande e maj kuch ghada so sas ande intrego ljuma, sa sas ande sumnkhaj thaj kuch bara. Kana e romni sas te uljel tele pa e trapti te sikavel pe ande peske shukar ghada e barvale grofoske hacisajlas voj peske uce papucensa ande kodol kuch ghada thaj pelas voj pale tele pe kodol bi bahtale trapti. Akanak paglas voj vi peski kor thaj mulas po than. O grofo rotas peske jakha avri thaj prahosardas peska kamada romnia pe mormunci. Ande e grofoski djis kernas but manush buci, mashkar sa kadal sas jekh sonome, bibahtalo parne balengo gadjo. Vov chi birijas te mukhel kodo ke e romni sas prahosardi kusa pesko sumnakuno pundro. - Kodo sumnakhaj musaj te kostulij perdo love" ghindojas o bibahtalo gadjo..... Vov chi birijas te mukhel o ghindo ke sas jekh romni prahosardi kusa jekh sumnakuno pundro. Jekh raci kana savori sovnas gelas vov chordanes pe mormunci thaj hunadas opre a romnia thaj chordas lako sumnakuno pundro thaj kana sas gata prahosardas vov la po dujto, konik te na lel sama so vov kerdas. Pala kodi raci nas aba soha paca pe kodol murmunci ke sako raci ashundjiolas jekh djuvliano glaso khaj rovelas thaj phenelas "sumnakhaj, sumnakhaj! De man palpale muro sumnakuno pundro!" E manush so trajinas pasha e murmunci chi birisarde pala jekh dopash bersh thaj o sherutno pa murmunci gelas khaj o barvalo grofo thaj phendas leske ke leska mula romnia naj paca ando grobo thaj ke varikhon trobuj te djal te vorbij a mula romniasa..... Kodi raci gelas o Grofo korkori, ke vov chi daralas te djal kote ke vov djanelas ke vi vov jutija pasha late kana vov merla.... Vov gelas kote thaj vorbijas lasa te na rovel racianca e romni. E romni rovelas thaj phenlas Sumnakhaj Sumnakhaj, de palpale muro sumnakuno pundro... O grofo rovelas thaj chi acharlas kanchi. Sostar rover muri kamadi romni? Phenlas vov roindos. Chak si tut jekh sumnakuno pundro phenlas vov lake palpale. Pe dujto raci bishadas o Grofo peske rashajes te djal te rudzji pasha peska romniako grobo, chi kodo chi zhutisardas. Intrego foro shunelas pala jekh vrama a romnia kana voj rovelas thaj mangelas pesko pundro palpale. O barvalo grofo manglas pala kodo peske buciaren te djan te shunen vaj von birin te vorbin a mula romniasa, numa chi kodo chi zhutisardas. Pala trin bersh thaj opral 1000 racia pa a romniako meripe shundas jekh sluga ande e grofoski djis sar o sonome, bibahtalo parne balengo gadjo vorbijas ande pesko suno, voj shunelas sar vov vorbijas ke vov keladas savoren thaj vi a mula romnia thaj vi e grofos. Voj purisardas kodo khaj o grofo thaj o grofo akhardas e sonome, bibahtalo parne balengo gadjes peste. O gadjo phendas ke vov sas aba pe murmunci thaj phendas ke chi kamel te djal po dujto. O grofo las avri jekh pistolo thaj phendes e bibahtale gadjeske ke te na djala vov pe murmunci tela o grofo les pushke ando shero. O bibahtalo gadjo darajlas te djal pe murmunci numa cirdas troma ande peste thaj gelas pe murmunci. O glaso rovelas maj dur, sa kade daravnes thaj roindas mangelas vov Sumnakhaj, Sumnakhaj, de palpale muro sumnakuno...